Questo xe el studio del pitor Carleto
versi di Rosetta Lazzarini, da Portorose li 11 agosto 1943

Xe tanto tempo che no vedo più la picia camareta coi palchetti sempre lustri, piazada sora i teti come un nido (un fià caldo). De lassù se pol veder el muro del Castel e tuta la cità co se indormenza.
Dentro se trova ogni conforto, senza pretese: un canapè, do sedie, un bel armonium, tende verdi, libri, fiori, tanti quadri sui muri e in un bocal un fascio … de penei (oh meno mal!).
Ghe saria anca i tubeti de colori ma i xe stai sgrinfignadi; un cavaleto vizin dela finestra in un canton e, drio del canapè, qualche carton.
Questo xe el studio del pitor Carleto (1).
Ogni vènerdi là i se dà convegno i artisti più famosi de Trieste, ma, cossa digo, in tuto el mondo teste più fine no se trova, né più degno parlar se pol sentir.
Vien Antonieta che la ghe dà straze anca ala Duse.
Co la declama, soto quela luse smorzada, un sentimento la ghe peta in ogni sua parola che ne incanta.
Cesare (2) fa comenti su Bodler con quel’ aria de gran conferenzier,
Carleto sona, la Baroni canta,
Pedra (3) ne conta, in versi, el suo tormento. La disi: “El cuor el me fa proprio mal; lu el xe partì, mi torno pel vïal de no ‘verlo fermà ‘desso me pento”.
Edera xe comossa, Guido tasi.
Per rianimar un po’ la compagnia, quela moreta cocola, Maria, (4) la ghe dà, prima, a tuti un per de basi po’, la ciol fora piati e bicierini, la spartissi puïna, olive, fruti; Carleto versa el vin, e in zito tuti i magna, i bevi, i rosiga susini.
Manca poco oramai a mezanote. 
Vien leto ancora qualche bel soneto per saziar anca el spirito.
Carleto el distuda la lume e “bona note”.
La resta sola, co i xe andadi via, la picia camareta coi palchetti sempre lustri, piazada sora i teti, un picio nido, pien de poesia.

(1) Carlo Walcher (1905-1972)
(2) Cesare Sofianopulo (1889-1968)
(3) Pedra Zandegiacomo (1903-1986)
(4) Maria Lupieri (1901-1961)